Sistemi mediatik i Maqedonisë së Veriut zhvillohet nën ndikimin e rrethanave shumë të trazuara politike. Edhe pse shumica e mediave janë në pronësi private, kjo nuk ka ndikim pozitiv në larminë dhe pavarësinë e përmbajtjes pasi mediat private shpesh janë të lidhura me interesa politike ose biznese që ndikojnë në përmbajtjen e tyre (1). MRT-ja, si shërbim publik, është vazhdimisht në gjendje shumë të paparashikueshme financiare dhe pozita e saj është e rrezikuar nga borxhet e vjetra ndaj institucioneve shtetërore (2). Numri i mediave është jashtëzakonisht i madh në krahasim me madhësinë e tregut të Maqedonisë Veriore – 45 stacione televizive dhe 68 radio stacione që transmetohen në nivel kombëtar, rajonal ose lokal (3). Një koleksion i gjerë mediash kritike dhe të pavarura funksionojnë dhe gjenden kryesisht në internet (1), duke përfshirë BIRN Maqedonia e Veriut, F2N2, Vidivaka etj. Në sferën online, ekziston një problem i madh me gjuhën e urrejtjes dhe narrativet toksike. Një pjesë e mediave online mbajnë marrëdhënie klienteliste me qendrat politike dhe të biznes qendrat e pushtetit, dhe shpesh prodhojnë ose përhapin dezinformata dhe propagandë në mënyrë të koordinuar (4).

Sipas Shoqatës së Gazetarëve të Maqedonisë (SHGM), gjatë 10 muajve të parë të vitit 2020, janë regjistruar 14 sulme dhe kërcënime të ashpra kundër gazetarëve. Gjithnjë e më shumë kërcënime për jetën e gazetarëve po raportohen në rrjetet sociale (5). Në të njëjtën kohë, Komisioni Evropian në raportin e tij të fundit thekson se politikanët dhe zyrtarët publik në Maqedoninë e Veriut ende duhet të demonstrojnë një nivel më të lartë të tolerancës ndaj kritikave dhe të promovojnë lirinë e shprehjes.

Niveli i njohurive mediatike në Maqedoninë e Veriut është jashtëzakonisht i dobët. Sipas një raporti të Institutit të Shoqërisë së Hapur (Sofje), Maqedonia e Veriut renditet e fundit (e 35-ta) në mesin e vendeve evropiane për sa i përket nivelit të njohurive medatike (6). Sipas IPSOS, televizioni është burimi më i zakonshëm i informacionit për shumicën e qytetarëve të Maqedonisë së Veriut, ndërsa rrjetet sociale dhe portalet online ndjekin respektivisht në vendin e dytë dhe të tretë. Qytetarët janë të ndarë në mënyrë të barabartë kur bëhet fjalë për besimin në media në përgjithësi (7).