Një numër i madh i mediave në Mal të Zi përballen me probleme të qëndrueshmërisë financiare dhe presioneve politike, dhe tendencat e rënies së cilësisë së standardeve profesionale, cenueshmëria ndaj gjuhës së urrejtjes, dezinformimit dhe propagandës janë të dukshme (1). Një burim i rëndësishëm i dezinformimit dhe i fushatave propagandistike janë mediat nga e njëjta zonë e të folurit, kryesisht tabloidet nga Serbia (2), botimet e shtypura të cilat shiten në të gjithë Malin e Zi. Presionet politike janë jashtëzakonisht të forta, gjë që është e dukshme edhe në shërbimin publik të Malit të Zi (RTCG), kalimi i të cilit nga një organizatë shtetërore e medias në një transmetues të vërtetë të shërbimit publik nuk ka përfunduar ende (3). Mediat kombëtare më të zhvilluara tregojnë shenja potenciali për gazetari hulumtuese dhe gjithashtu raportim të specializuar (4), dhe në këtë fushë dallohen Qendra Digjitale Forenzike, Qendra për Gazetari Hulumtuese dhe Raskrinkavanje.

Ndër vendet e Ballkanit Perëndimor, Mali i Zi ka pozicionin më të ulët në listën globale të lirive të mediave të Reporterëve pa Kufij. Raporti thekson se autoritetet vazhdojnë të ngacmojnë mediat dhe gazetarët profesionistë, ndërsa rastet kryesore të dhunës ndaj gazetarëve mbeten të pandëshkuara (5). Freedom House gjithashtu thekson se disa nga sulmet më të spikatura fizike ndaj reporterëve hetues mbeten të pazgjidhura, ndërsa gazetarët -në përgjithësi -shpesh përjetojnë vetë-censurim për të shmangur kërcënimet, presionet politike, paditë e shtrenjta për shpifje ose humbjen e punës (6).

Edhe pse gjendja e njohurive mediatike në Malin e Zi është e pafavorshme, mund të priten përmirësime në periudhën afatmesme dhe afatgjatë, pasi Mali i Zi ka zbatuar disa nga përpjekjet pioniere në rajon në fushën e futjes së njohurive mediatike në sistemin arsimor. Sipas IPSOS, shumica e qytetarëve pohojnë se i besojnë medias. Shumica e tyre ndjekin lajmet televizive çdo ditë dhe besojnë se ky është mediumi që lëshon informacion të saktë dhe të plotë. (7).