Медиумскиот систем на Северна Македонија се развива под влијанието на мошне турбулентните политички околности. Иако најголемиот број медиуми се во приватна сопственост, тоа нема позитивен ефект на разновидноста и независноста на содржините, затоа што приватните медиуми често се поврзани со политички или деловни интереси што влијаат на нивните содржини (1). МРТ, како јавен сервис, постојано се наоѓа во мошне непредвидлива финансиска ситуација, а опасноста дополнително е засилена од старите долгови кон државните институции (2). Бројот на медиуми е екстремно голем споредено со големината на пазарот во Северна Македонија – 45 телевизиски станици и 68 радио станици емитуваат програма на национално, регионално или локално ниво (3). Голем број на критички и независни медиуми работат и се наоѓаат главно на интернет (1), вклучувајќи ги БИРН Северна Македонија, Ф2Н2, Види вака, итн. Во онлајн сферата постои голем проблем со говорот на омразата и токсичните наративи. Дел од онлајн медиумите одржуваат клиентелистички односи со политички и економски центри на моќ и често произведуваат или шират дезинформации и пропаганда на координиран начин (4).

Според Здружението на новинарите на Македонија (ЗНМ), во првите десет месеци од 2020 година, забележани се 14 напади и жестоки закани врз новинари. Сè повеќе и повеќе закани по живот за нивинарите се забележуваат на социјалните мрежи (5). Истовремено, Европската Комисија вели, во најновиот извештај, дека политичарите и јавните функционери во Северна Македонија сè уште треба да покажат повисоко ниво на толеранција на критика и да ја промовираат слободата на изразувањето.

Нивото на медиумска писменост во Северна Македонија е многу ниско. Според извештајот на Институтот отворено општество од Софија, Северна Македонија е последно-рангирана (на 35-то место) помеѓу европските држави по нивото на медиумска писменост (6). Според ИПСОС, телевизијата е најчесто користен извор на информации за најголемиот број граѓани на Северна Македонија, а следат социјалните мрежи и онлајн порталите на второ и трето место, соодветно. Граѓаните се поделени рамномерно од гледна точка на општата доверба во медиумите (7).