Голем број медиуми во Црна Гора се соочуваат со проблеми поврзани со финансиската одржливост и политички притисоци, а забележливи се трендови на опаѓање на квалитетот на професионалните стандарди, на ранливост на говор на омраза, дезинформации и пропаганда (1). Значаен извор на кампањи за дезинформирање и пропаганда се медиумите што доаѓаат од земјите во заедничкото јазично и говорно подрачје, првенствено таблоидите од Србија (2), чии печатени изданија се продаваат во цела Црна Гора. Политичките притисоци се мошне силни, што е видливо и кај јавниот сервис на Црна Гора (РТЦГ), чија трансформација од државна медиумска организиција кон вистински јавно-сервисен радиодифузер сè уште не е завршена (3). Најразвиените национални медиуми покажуваат знаци дека поседуваат потенција за истражувачко новинарство и специјализирано извествување (4), а на тоа поле се истакнуваат Дигиталниот форензички центар, Центарот за истражувачко новинарство и „Раскринкавање“.

Помеѓу државите од Западен Балкан, Црна Гора има најниска позиција на глобалната листа на слободата на медиумите на Репортери без граници. Извештајот вели дека властите продолжуваат со притисоците врз медиумите и професионалните новинари, додека најсериозните случаи на насилство врз новинарите остануваат неказнети (5). Фридом Хаус, исто така, вели дека некои од најсериозните случаи на физички напади врз истражувачките новинари остануваат нерешени, додека новинарите во целина често прибегнуваат кон само-цензура за да ги избегнат заканите, политичкиот притисок, скапите судски процеси за клевета, или губењето на работното место (6).

Иако состојбите на полето на медиумската писменост во Црна Гора се неповолни, на среден и долг рок можат да се очекуваат подобрувања, знаејќи дека Црна Гора презема некои пионерски чекори во регионот на полето на внесување на медиумската писменост во образовниот систем. Според ИПСОС, мнозинството граѓани велат дека имаат доверба во медиумите. Мнозинството граѓани ги следат телевизиските вести секојдневно и веруваат дека тоа е медиумот што објавува точни и целосни информации (7).